miércoles, 21 de febrero de 2018

24 de Febreiro, Día de Rosalía: Adícalle os teus caligramas



As Bibliotecas Municipais, conxuntamente co Servizo de Normalización Lingüística de Redondela, propoñémosvos unha actividade para agarimar á poeta no seu día. Este ano farémolo adicándolle caligramas cos seus poemas.

Podedes ver e colorear os caligramas rosalianos que vos temos preparados nas bibliotecas, ou podedes facer vós o voso deseño.

Entre o mércores 21 de febreiro e o venres 2 de marzo, debuxa na biblioteca os poemas de Rosalía.

Esta actividade forma parte dos actos de homenaxe que o Concello de Redondela lle vai render á poetisa esta fin de semana, coincidindo co 24 de febreiro, Día de Rosalía:
  • O venres 23 de febreiro, ás 18:00 h., e dentro dos Venres Cativos do Servizo de Normalización Lingüística, o auditorio do Multiúsos de Chapela acollerá unha obra de títeres, titulada: A viaxe de Rosalía.
  • O sábado 24 de febreiro, ás 18:00 h., a Alameda de Chapela acollerá un acto institucional, con música e poemas onde se inaugurará a placa co novo nome deste parque urbán: Rosalía de Castro.

martes, 20 de febrero de 2018

Agasallo dos Viadutos

O Concello de Redondela, a través da súa Concellería de Xuventude, leva 17 anos convocando o Premio de Relatos Curtos "Os Viadutos", para escritores noveis.

Este ano, por primera vez, convoca un premio de novela, que levará o mesmo nome. 2018 será a I edición do Premio Viadutos de Novela, que convocan conxuntamente o Concello de Redondela e mais a Editorial Galaxia.
O Servizo de Xuventude a través das bibliotecas de Redondela quere achegar  a cada  usuario das mesmas un exemplar dos relatos da XVII edición que se complementa coas bases que rexen a convocatoria deste ano.
Ata esgotar existencias

lunes, 19 de febrero de 2018

#eubibliotecasredondela50

As Bibliotecas de Redondela celebramos, este ano 2018, os nosos primeiros 50 anos de existencia e imos festexalo de moitas maneiras.


Unha delas será facer visible o novo carné das mesmas, que desde este ano convértenos en usuarios da Rede de Bibliotecas Públicas de Galicia.
Para eso pedímosvos que subades unha fotografía ás vosas redes sociais: Instagram ou Facebook, onde amosedes este novo carné, etiquetando a imaxe co cancelo #eubibliotecasredondela50.

Pero tamén podedes fotografarvos cos carnés antigos, sería unha bonita homenaxe a todos estes 50 anos de servizo das bibliotecas municipais. Animádevos a participar!
 

viernes, 16 de febrero de 2018

Redondela convoca a 1ª edición do Premio Viadutos de Novela


O Concello de Redondela, a través da súa Concellería de Xuventude, leva 17 anos convocando o Premio de Relatos Curtos "Os Viadutos", para escritores noveis.

Este ano, por primera vez, convoca un premio de novela, que levará o mesmo nome. 2018 será a I edición do Premio Viadutos de Novela, que convocan conxuntamente o Concello de Redondela e mais a Editorial Galaxia.

Poderán concurrir neste concurso persoas entre 18 e 35 anos que presenten un texto inédito en galego, cunha extensión mínima de 100 páxinas.

O prazo de presentación remata o 30 de marzo.

Se tedes ese pulo de narradores no voso interior... non o dubidedes e animádevos!


jueves, 8 de febrero de 2018

"A España baleira": nova cita cos Amigos das Bibliotecas


Os Amigos das Bibliotecas xa nos teñen preparado un novo coloquio. Desta vez o profesor de historia David Faro falaranos de "A España baleira". Así, baseándose no homónimo libro de Sergio del Molino "La España vacía: viaje por un país que nunca fue", percorreremos as peculiaridades dun país onde a despoboación progresiva do rural configura unha nova realidade xeográfica, onde as paisaxes fantasmagóricas e baleiras viven agochadas detrás da existencia do territorio coñecido.

Será na sala de exposicións do Multiúsos de Chapela, o venres 23 de Febreiro, ás 20:30 h.

Colaboran as Bibliotecas Municipais de Redondela.